تجبرني الاحداث الاخيرة ان لا اتوقف عن التفكير فيما يحدث وسيحدث لهذا البلد الصغير امام كل هذه العواصف الغبية التي تجتاحنا من كل اتجاه...ساتكلم اليوم عن الحدث الابرز خلال 3 ايام الاخيرة..........واستنو بس دنتو حتشوفو سنين سودا
وصول السيد الفالي الى الكويت و وجوده على ارضها حاليا بعد ان تقرر استبعاده على اول طائرة فور دخوله الى المطار, الا انه و كما ذكر في الصحف تم الافراج عنه بوساطه من النائب عاشور بعد ان كان قد احتجز لفترة في مخفر مملكة جليب الشيوخ... للحين كل شي طبيعي ومفهوم الا موقف وزارة الداخلية وراح نشوف شلون من خلال تصريحاتهم للصحف
التصريح الاول لوزارة الداخلية(على ذمة الصحف) انه الفالي عليه قيد امني لذلك منع من دخول الكويت ....زين شنو القضية اللي عليه؟؟ وصدر فيها حكم او لا؟؟؟ وشنو الحكم اذا كان صدر؟؟؟ واذا عليه حكم لماذا لم ينفذ؟؟؟
صرحوا في اليوم الثاني بانه الفالي لديه اقامة صالحة حتى عام 2011 وطلب منه ان ينهي ارتباطاته لمغادرة الكويت قبل الخميس القادم.....اذا كان عليه شي ليش مالغيتوا اقامته؟؟؟ اذا كان عليه شي ليش سمحتوا له بالدخول؟؟؟
واذا كان ماعليه شي ليش تطلبون مغادرته قبل الخميس؟؟؟؟
عجيب امركم يالداخلية!!! تصريحات مبهمة ومو متوافقة مع الاحداث....صراحة صدق من قال انه اكثر الازمات سببها سوء تصرف الحكومة....الحين ضروري ولازم يطلع وزير الداخليه ويعقد مؤتمر صحفي ويعلمنا اهو بصق ولا اكل؟؟؟؟ بصق ولا باس؟؟؟
في نهاية هالموضوع انا ماخذ موقف حيادي ولا يهمني الفالي او غيره كثر ماتهمني مصلحة الكويت اولا واخيرا.... وانا ما اتكلم عن اسماء او جهات بعينها كثر ما اتكلم عن الصح والخطأ.... لكن مهما كان المستفيد(حتى لو قصده اثارة الطائفيه) والمتسبب من وراء تصعيد قضية الفالي...اقوله برافو نجحت بامتياز.....وفالك طيب
على الجانب الاخر(بس هم مو مشرق لاتستانسون) قررت جهة نسيت شسمها بس اعتقد المركز العالمي الاسلامي او شي من هالطقه جزاكم الله خير...قررت تاسيس مركز للحوار السني الشيعي قريبا في الكويت والهدف من وجوده هو نزع فتيل الاحتقان بين السنه والشيعه والبحث عن قواسم مشتركه بينهم وترسيخ مبادئ الوحده الوطنية والاسلامية و......الخ وكله كلام انشائي نعرفه كلنا عدل وماخوذ خيره من زمان......... بما ان الهدف هذا لن يتحقق الا بعد ان تحج البقر على قرونها وتتعلم الخرفان كيف تعزف كوردات على جيتار اسباني .......نصيحتي لاصحاب المركز ان ياخذون فليسات التاسيس ويروحون فيها تايلاند وبعد التدردع والسهر ليلا والتسدح عالبحر والمساج نهارا ان يقرروا دعوة كم فتاة تايلندية من النوع الطيب (موديلز عافاك الله ) لدخول الدين الاسلامي واقناعهم بالقدوم الى ارضنا الحبيبة وبعد سنتين فقط يتم منحهم جنسية تحت بند اعمال خليعة......لو حصل هالشي صج....ماراح استغرب كلش ...لاني بالكويت
:)
منوعات
تصريح هايف امس: نحن ضد متطرفي السنة والشيعة (من صجه ولا ينكت الحبيب) و اليوم صورته مع الطبطبائي وبيدهم مسودة استجواب لرئيس الحكومة بسبب قضية الفالي .....لا حشا من قال تطرف
عدم شرعية توزير نورية وموضي/الغاء تجريم الفرعيات/ النية لاستجواب الشمالي ونورية/انهيار البورصة/قرارت باقر وكلام عن استجوابه/التقدم بطلب استجواب لرئيس الوزراء/سحب الجنسية من 5 مواطنين/صورة خمور الدواوين/القرض الروسي/واخيرا قضية الفالي
كل هذه الاحداث في اقل من شهر....اللهم زيد وبارك...عسى مايحسدونا بس... وبما انه غسلنا ايدنا من الكرة والاتحاد بكبره اقترح دخول الحياة السياسية عندنا بالكويت في سباقات 200 متر حواجز في الاولمبيات القادمة في لندن بسبب سرعتها الغير عادية...وانصح اخوانا اللندنيين ان يكون عندهم تصريح من البلدية بوضع الحواجز على مضمار السباق....والا ترا الجرافات جاهزة وتوها طالعه من الفحيحيل وماعندهم مانع يروحون زحف لي لندن بس عشان يخربون
اذا كنت متجه الى عملك ورايت ازدحام مروري غير طبيعي قبل الدوار المؤدي الى مكان عملك فاعلم يقيناااا.....ان هناك حادث عند الدوار...... او... شرطي ينظم حركة المرور
في السابق كانت قضية سرقه او جريمة قتل تهز المجتمع الكويتي هز ولاخصر نجوى فؤاد....لكن حاليا اصبحت 3 صفحات يوميا لقسم الحوادث او قسم الامن والمحاكم قد لاتكفي من كثر الجرائم في الديرة (طب وتخير كله موجود) .....والاسباب معروفة وواضحه كالشمس لكن احد ما (كبييير ياكبيييير) لايريد التحرك لحل هذه المشكلة وتوجيه المسؤولين لمعالجتها..........وياجبل مايهزك ريح
كلمات
كلمات اعجبتني للشاعر الامير عبدالرحمن بن مساعد بعنوان العادة جرت
العادة جرت
كل طالب مجتهد دمه ثقيل
العادة جرت
كل مخلص في الهوى حظه قليل
العادة جرت
العطوف اللي كريمٍ في الجرايد
في الأزقة والحواري له عوايد .. يصبح القاسي البخيل
العادة جرت
جُل من يصبح ثري .. يكتب شعر
والقصائد تحتري اغلى سعر
الشعر اصبح مجلة .. جلها غث وهزيل
العادة جرت
لمّا نسافر كلنا في الصيف .. نمشي مخشبين
كلنا نحكي بفخامة .. نمشي بفخامة .. والابتسامة لما نسّلم
نبتسم كأن فيه مصورين
ورغم اننا نسافر لجل نلقى بعض .. ونعرف بعض
الا اننا لما انتقابل نلتفت متجهمين
ماهو جنون .. ولا عبط
تظهر أغاني من نمط .. أربع سنين انتطالع بالعيون
وفي المواعيد اللي ماادري منهو كان العبقري اللي عطاها
نجلس في نفس الاماكن .. ننتظر نفس الوجيه
تظهر بكامل بهاها
ويبتدي ذاك الحوار السرمدي :
- شف هذاك شلون لابس .. ماهو صاحي
- شف هذاك موجود في كل النواحي
- شف هذيك شلون تضحك .. ياخزياه ياعيباه يالله
- شف هذيك شلون تمشي .. شف هذاك شلون جالس
- شف رفيقك .. ليش عابس ؟؟ خل نروح ونسأله
- لا انتظر هذا ماشي مع هله
وينتهي هذا الحوار السرمدي
فينا نقول : وش هالصخب .. هالديرة مليانه عرب !!
كأننا متفاجئين
ولما نرجع بالسلامة .. العادة جرت .. انا نكون متنكدين
ومافي سبب غير اننا ما كنا حنا
غير اننا لما نسافر .. دايم نكون ممثلين
ولجل نطلع من تقمص دورنا .. لما نرجع
نحتاج نقعد ناطرين أسابيع وأيام .. ونظهر من الانفصام
العادة جرت
انّا نجل الأجنبي .. ونقصي القريب
العادة جرت
انها الايام تمضي ومسجد الاقصى سليب
العادة جرت
كل ما جو الخليج صفي وراق
يبتدي العم سام .. عزف موال العراق
العادة جرت
كل ما اكتب قصيدة .. اوصف الواقع بها
القى جاهل ما اريده .. يعتقد انه لها
العادة جرت
كل ما اكتب يقيني أو ظنوني ..
يكاد المريب أن يقول خذوني
9 comments:
الانتظار سيد الوقت
:)
http://www.alraimedia.com/alrai/Article.aspx?id=93016
والوقت سيد الانتظار
احب اتفلسف :) لول
اذا كان عليه منع من دخول الكويت، ليش يودونه المخفر؟
ليش ما يخلونه بالمخفر حتى موعد الطيارة؟
مثل ما قلت الحكومة اهي راس البلا!
* ليش ما يخلونه في المطار مو في المخر حتى موعد الطيارة؟
مادري والله انا هذا اللي قريته بالجرايد :)
عادي توقع كل شي
الموضوع يا خوي أكبر من قضية الفالي ..
أكبر من هايف والطبطبائي ..
أكبر من الطائفيه ..
أكبر من الجرايم داخل المجتمع ..
الموضوع يمس أمن البلاد ..
الموضوع يمس الفساد في حكومة الدوله ..
وعدم قدرتها على التعامل مع الأزمات ..
:)
عدل كلامك وهذا اللي قلناه
الحالة السيئة تتمثل في مواقف وازمات
وموضوع الفالي مجرد مثال لا اكثر ولا اقل على الحال الردي وسوء الاداره واذا تبي اقدر اعطيك 100 مثال غيره
شكرا على المرور :)
زيارتي الاولى لمدونتك الرائعه وان شاء الله مو الاخيره
وكل كلمه قلتها صحيحه :)
وكل شي صوب وتصريحات هايف صوب
Post a Comment