امس وانا بالسيارة مع 2 من الربع مرينا على صالة الافراح القريبة من بيتنا ولفت نظري سيارة اسعاف طاقة الفلشر الاخضر وصافطة عند باب الصالة كان الوقت تقريبا نص الليل.. .....لو كنا في ديرة اوروبية او امريكا وشفت سيارة اسعاف جدام كنيسة وقت الزفاف ممكن اتخيل ان المعاريس طالعين بحركة يديدة او مثل مايقولون فنتق....و ممكن اقول ان احد المعاريس يشتغل دكتور او ممرض في مستشفى فرنسي وعنده بعض الخفارات بالعدان او كاتب في مستوصف مانهاتن وحبوا ربعه يخدمونه عشان يسوي شي يكسر فيه مراسم العرس التقليدية عندهم!!..........لكن بالكويت لا يمكن يكون السبب الا مأساوي....شنو الاحتمالات الممكنة لوجود سيارة اسعاف امام صالة الافراح؟؟؟؟
.............................
شخصيا افترضت عدة احتمالات وبعضها كما يلي ....العروس اصيبت بانهيار عصبي بعد ما انشقت بدلتها من الفشلة ومن خز الحريم....تدافع الحضور للرقص والهز على احد اغاني الجسمي ادى الى وقوع ضحايا.... المعرس تعرجب بالبشت واهو صاعد الكوشة طاح وانشق راسة.....ام العروس طاحت غشيانة مو مصدقة ان بنتها تزوجت بعدما كانت بايرة....المعرس حس بغلطته باخر لحظة وحب ينقذ نفسه بمشهد تمثيلي.... ام المعرس ماعجبها البوفيه اللي يايبينه اهل العروس وسوت مشكلة.....احد العانسات الحضور احترت من العروس وحبت تخرب الليلة.....المعرس صك العروس بوكس وكسر خشمها لانها كبت العصير على دشداشته.....العروس ماعجبها العرس لان مكياجها مو حلو وحبت تخرب العرس يمكن يعيدونه لها ......واحتمالات اخرى
>>>>>>
مهما كان السبب الحقيقي اظن انه المعاريس تعقدوا من هالليلة الشؤم.....واكيد الريال راح يذكر هالمشهد طول عمره ويمكن اذا صارت مشكلة راح يقولها انا الغلطان اللي خذتج يالقبسة وترد عليه وتقوله انا قبسة ولا اهلك اللي خربوا عرسي وكلمة منه ورد منها والحياة جحيم.....ما اقول الا الله يعينهم اثنينهم على هالليلة السودا...وانشالله يقدرون يتجاوزونها بنجاح ...لكن تخيل انه بعد مايتجاوزون السالفة بعد اسبوعين والمرة مستانسة انها بتروح شهر العسل اخيرا.... والاهل رايحين يودعونهم بالمطار كنوع من المجاملة الاجتماعية وحبا في التسوق بالمطار....و عند كاونتر الجوازات الريال يعطي الموظف جوازه وجواز مرته ومتشققين وياشرون حق اهلهم من بعيد...يطلع الحجي عليه منع سفر وضبط واحضار بسبب اقساط متاخرة على سيارة البورش اللي يتفلسف فيها جدام المرة ويسحبه العسكري ويقطه بنظارة المطار.....شنو ممكن يكون موقف العروس وقتها...اكيد بتروحله النظارة وبتقولة انا القبسة ولا انت المنتف اللي ماعندك تدفع بس شاطر بلسانك...مالت عليك وعلى الساعة اللي شفتك فيها
,,,,,,,,,,
بصراحة وبعيدا عن السخرية ...اتمنى من المعاريس انه ينسون هالسالفة ويعيشون حياة سعيدة واتمنى ان يكون الشخص اللي يت عشانه الاسعاف بخير وعافية....واخيرا اتمنى من اي معاريس يدد ان يفكرون زين اذا يبون عرس او شهر عسل احسنلهم والله يوفق الجميع
_______________________________________________________________
كلمات
........
كلمات اعجبتني للشاعر الامير بدر بن عبدالمحسن بعنوان الجريدة
.....................................................................
الجريده ..
ادري وش سر الجريده
به أحد .. يقطع وريده ..
وينزف أخبارٍ جديده ..
وحنا نقراها الصباح ..
دنيا مكتوبه فـ ورق .. دنيا من دم .. وعرق ..
دنيا مجنونه ارق .. وهم ..
انسرق .. إحترق .. المهم
كلها أخبارٍ سعيده
وحنا نقرلها الصباح ..
لو طبعنا .. صفحة ما فيها خبر ..
لا حروف .. ولا صور
صفحة يملاها البياض ..
صفحة تملانا بياض .. ما يعكرها الحبر ..
كان ذي الصفحة الوحيدة
اللي اقراها الصباح .. في الجريدة
22 comments:
هههههه
الاسعاف سويت منه قصه
والامير سوى من الجريدة قصه
:)
عيدك مبارك
وعساك من عواده
ما ادري ليش الناس مستعيلين
من اليوم بادين يباركون ويدزون مسجات
قلت ابارك وياهم
حفظك الله ورعاك
الحين عقب ما شخطت فيهم احتمالات تمنيت لهم حياة سعيدة لوووووووول
عاد تدري عندي صديقة لو شايفه الاسعاف جان راحت سألتهم ... كانت هوايتها تلحق الاسعاف او المطافي تعرف شنو صاير ههههههه والله مره لحقتهم جان يسفط اللي يسوق الشاحنة مالت المطافي ولا تسفط وراه جان يقولها نعم اختي تبين شي لاحقتنا
ردت عليه بكل قواة عين اي بعرف شالسالفة وين الحريجة؟؟
بولطيف
كل عام وانت بخير حبيبي
كل شي وراه قصة حتى لوكان صغير
والحياة مو كلها سياسة خلنا نغير شوي :)
شكرا على المرور
وعيدك مبارك
زوز
رفيجتج هذي فلم كلش مو لقافه لول
ماشخطت بس غشمرة :)
شكرا على المرور
خيالك واسع صراحة لول
يمكن المسعفين رايحين يباركوون للمعرس
هذي ماتصير بامريكا بس تصير هني بالكويت!! انا سامعة سوالف عن هالمسعفين..متعودين عالوضع عادي واحد بالسيارة وراهم يتشهد واهمه مبطليين الراديو ويغنون
شي طبيييييعييييييي
بوشا
فعلا هذا احتمال ماخطر على بالي ومايصير الا عندنا
خليهم يغنون ويرقصون ويعيشون حياتهم
طول ماانهم يادون عملهم
شكرا على المرور :)
كل عام وانت بخير
:)
فنكوووووووشي وكل غالي على قلبك
عيدكم مبارك
كل عام وانتوا بألف خير
وعساكم من عواده
:")
عيدك مبارك و كل عام و إنت بخير
هههههههههه
والله بعد كلامك ما اظن المعاريس بينسون
خخخ
بس حلوه يممكن يعيدون للعروس عرسها
:P
انا اتوقع واحد طاح يا غشيان يا انتقل الى رحمة الله
لان صارت معانا صراحه
توفى عم المعرس وهو يرقص
مأساه
الله يرحمه
المهم
كل عام وانت بخير
وعيدك مبارك
وتتهنى بعرس جميل ورايق بدون مصايب واسعافات
حلوه تحليلاتك
تصدق انا الحين الا بعرف شفيهم لووووول
اللقافه وماتسوي
جان وقفت يمهم شفت شسالفته وقلت لنا
----
عيدك مبارك وكل عام وانت بخير
عيدك مبارك وكل عام وانت بخير
:)
اولها سيارة اسعاف الله يستر من اللي وراها
كل عام و انت بخير
و عساك تعوده انت و الاهل بالف صحة و سلامة
سمعت ان في طقاقة مخاوية
(يعني تون على القرين مالها):)
واي وحدة تحش فيها تناديها وتطقها
-------------------------
تقبل الله طاعتكم
وكل عام وانتم بخير
موك
كل عام وانت بخير :)
زوز
تسلمين بالغالية
ايامج سعيدة دوم يارب :)
بوجيج
ايامك سعيدة وانت بصحة وسلامة يارب
سيليزيا
عيدج مبارك انشالله وانتي بصحة وسلامة
وفعلا حادث مؤسف الله يرحمه
انشالله ايام الكل سعيدة :)
وديري بالج ليلة عرسج
ماكنتوش
لول صج لقافة كويتيه
وانا شكو اسالهم خل يشوفون حالهم اول
كل عام وانتي بخير :)
كاريزما
وانتي بصحة وسلامة....شكرا على المرور
انتر
صدقت الله يستر ويعينهم
وانت بصحة وسلامة وعيدكم مبارك :)
ابوالوليد
لول احتمال كل جايز
وكل عام وانتو بخير :)
Post a Comment